Rooftop Solar: ఇంట్లో విద్యుత్ వినియోగం పెరుగుతున్న కొద్దీ నెలవారీ కరెంట్ బిల్లు కూడా కుటుంబాలపై భారం పెంచుతోంది. ముఖ్యంగా నెలకు రూ.2,000 లేదా అంతకంటే ఎక్కువ విద్యుత్ బిల్లు చెల్లించే వారు రూఫ్‌టాప్ సోలార్ వైపు ఆసక్తి చూపుతున్నారు. ఇంటి పైకప్పుపై సోలార్ ప్యానెల్స్ ఏర్పాటు చేసుకోవడం ద్వారా విద్యుత్ ఖర్చును తగ్గించుకోవడంతో పాటు కేంద్ర ప్రభుత్వ సబ్సిడీ, బ్యాంక్ లోన్ వంటి అవకాశాలను కూడా వినియోగించుకోవచ్చు.
విజయవాడలోని ఐజీఐ సోలార్‌కు చెందిన ఎక్స్‌పర్ట్ ఆదిత్య ప్రభాకర్ న్యూస్18 తెలుగుకు వెల్లడించిన వివరాల ప్రకారం, ఇంటి విద్యుత్ వినియోగాన్ని బట్టి సరైన సామర్థ్యం కలిగిన సోలార్ సిస్టమ్‌ను ఎంపిక చేసుకోవడం కీలకం.
3KW రూఫ్‌టాప్ సోలార్‌కు ఎంత ఖర్చు?
నెలకు సుమారు రూ.2,000 కరెంట్ బిల్లు వచ్చే ఇంట్లో 250 నుంచి 300 యూనిట్ల వరకు విద్యుత్ వినియోగం ఉండొచ్చని అంచనా. ఇలాంటి కుటుంబాలకు 3 కిలోవాట్ రూఫ్‌టాప్ సోలార్ సిస్టమ్ సరిపోవచ్చని వివరించారు.
దీనికి సుమారు 180 నుంచి 220 చదరపు అడుగుల నీడలేని పైకప్పు అవసరం. మొత్తం వ్యవస్థకు సుమారు రూ.2.1 లక్షల వరకు ఖర్చవుతుందని, పీఎం సూర్య ఘర్ ముఫ్త్ యోజన కింద సబ్సిడీ పొందిన తర్వాత ఖర్చు సుమారు రూ.1.32 లక్షల వరకు తగ్గవచ్చని పేర్కొన్నారు. ఈ సామర్థ్యం కలిగిన సిస్టమ్ నెలకు దాదాపు 300 నుంచి 450 యూనిట్ల విద్యుత్ ఉత్పత్తి చేయగలదని వివరించారు.
రూ.78 వేల వరకు సబ్సిడీ
పీఎం సూర్య ఘర్ ముఫ్త్ యోజన కింద సిస్టమ్ సామర్థ్యాన్ని బట్టి గరిష్ఠంగా రూ.78,000 వరకు కేంద్ర ప్రభుత్వ సబ్సిడీ లభిస్తుందని కథనంలో పేర్కొన్నారు. నెట్ మీటరింగ్ ఉన్న సోలార్ సిస్టమ్ ద్వారా అవసరానికి మించి ఉత్పత్తి చేసిన విద్యుత్‌ను గ్రిడ్‌కు పంపించి బిల్లు క్రెడిట్లు పొందే అవకాశం ఉంటుంది.
మొత్తం డబ్బును ఒకేసారి చెల్లించలేని వారు కొంత డౌన్‌పేమెంట్ చేసి మిగిలిన మొత్తానికి బ్యాంక్ లోన్ తీసుకునే అవకాశాన్ని పరిశీలించవచ్చు. ఉదాహరణగా రూ.20,000 ప్రారంభ పెట్టుబడి పెట్టి మిగిలిన మొత్తాన్ని రుణంగా తీసుకునే విధానాన్ని కథనంలో వివరించారు.
Also Read: AP Rains: ఆంధ్రప్రదేశ్‌లో మూడు రోజులు వర్షాలు.. ఈదురుగాలులపై వాతావరణ శాఖ హెచ్చరిక
రూ.6,000 బిల్లు అయితే 6KW సిస్టమ్
నెలకు రూ.6,000 వరకు విద్యుత్ బిల్లు వచ్చే ఇంట్లో 700 నుంచి 900 యూనిట్ల వరకు వినియోగం ఉండొచ్చు. ఇలాంటి అవసరానికి 6KW రూఫ్‌టాప్ సోలార్ సిస్టమ్ సరైన ఎంపికగా పేర్కొన్నారు.
దీనికి 450 నుంచి 550 చదరపు అడుగుల పైకప్పు అవసరం కాగా, మొత్తం ఖర్చు సుమారు రూ.5 లక్షల నుంచి రూ.6 లక్షల వరకు ఉండొచ్చు. 6KW సిస్టమ్ నెలకు సుమారు 650 నుంచి 750 యూనిట్ల విద్యుత్ ఉత్పత్తి చేయగలదని, నెలవారీ విద్యుత్ ఖర్చులో సుమారు రూ.5,000 నుంచి రూ.6,500 వరకు ఆదా అయ్యే అవకాశం ఉందని వివరించారు.
రూ.10,000 బిల్లు అయితే 10KW వరకు అవసరం
పెద్ద ఇళ్లు లేదా విల్లాల్లో నెలకు రూ.10,000 వరకు కరెంట్ బిల్లు వస్తే విద్యుత్ వినియోగం సుమారు 1200 నుంచి 1500 యూనిట్ల వరకు ఉండొచ్చు. ఇలాంటి అవసరానికి 10KW రూఫ్‌టాప్ సోలార్ సిస్టమ్ అవసరమవుతుందని తెలిపారు.
దీనికి 800 నుంచి 1000 చదరపు అడుగుల పైకప్పు స్థలం అవసరం. మొత్తం ఖర్చు సుమారు రూ.10 లక్షల వరకు ఉండవచ్చు. ఈ సిస్టమ్ నెలకు దాదాపు 1100 నుంచి 1400 యూనిట్ల విద్యుత్ ఉత్పత్తి చేయగలదని పేర్కొన్నారు.
సోలార్ ప్యానెల్స్ సాధారణంగా 20 నుంచి 25 సంవత్సరాల వరకు పనిచేస్తాయని ఆదిత్య ప్రభాకర్ తెలిపారు. బ్యాటరీ బ్యాకప్ అవసరమైతే అదనంగా సుమారు రూ.50,000 వరకు ఖర్చవచ్చు. సరైన పైకప్పు స్థలం, సబ్సిడీ, నెట్ మీటరింగ్, ప్రారంభ పెట్టుబడి వంటి అంశాలను పరిశీలించి కుటుంబ అవసరానికి తగిన సిస్టమ్‌ను ఎంపిక చేసుకోవడం ముఖ్యమని వివరించారు.
