Indiramma Illu: ఇందిరమ్మ ఇళ్ల పథకానికి దరఖాస్తు చేసి లబ్ధిదారుల జాబితాలో చోటు దక్కని వారికి కీలక అప్‌డేట్ వచ్చింది. దరఖాస్తు సమయంలో డిపాజిట్‌గా చెల్లించిన రూ.10 వేల మొత్తాన్ని తిరిగి సంబంధిత దరఖాస్తుదారుల బ్యాంక్ ఖాతాల్లో జమ చేసేందుకు తెలంగాణ హౌసింగ్ బోర్డు చర్యలు చేపట్టింది.
హైదరాబాద్‌లోని 16 నియోజకవర్గాల నుంచి ఇందిరమ్మ ఇళ్ల కోసం మొత్తం 60,720 దరఖాస్తులు అందగా, వివిధ శాఖల రికార్డులతో పరిశీలించిన అనంతరం తొలి దశలోనే సుమారు 40 వేల దరఖాస్తులను అనర్హమైనవిగా గుర్తించారు. అర్హత సాధించని వారికి వారు చెల్లించిన డిపాజిట్ మొత్తాన్ని తిరిగి చెల్లించనున్నారు.
హౌసింగ్ బోర్డు వర్గాల సమాచారం ప్రకారం, రూ.10 వేల రిఫండ్ ప్రక్రియ నేటి నుంచి ప్రారంభం కానుంది.
60,720 దరఖాస్తుల వెరిఫికేషన్
హైదరాబాద్‌లోని 16 అసెంబ్లీ నియోజకవర్గాల పరిధిలో ఇందిరమ్మ ఇళ్ల కోసం వచ్చిన 60,720 దరఖాస్తులను అధికారులు విస్తృతంగా పరిశీలించారు.
దరఖాస్తుదారులు అందించిన వివరాలను రెవెన్యూ, రవాణా, జీహెచ్‌ఎంసీతో పాటు ఇతర సంబంధిత శాఖల రికార్డులతో క్రాస్ చెక్ చేశారు. ఈ ప్రక్రియలో భాగంగా 360 డిగ్రీల వెరిఫికేషన్ చేపట్టినట్లు సోర్స్ సమాచారం చెబుతోంది.
ఈ తనిఖీల అనంతరం తొలి దశలో సుమారు 40 వేల దరఖాస్తులు అర్హత ప్రమాణాలకు సరిపోలలేదని గుర్తించారు. దీంతో ఆయా దరఖాస్తుదారులు ముందుగా చెల్లించిన రూ.10 వేల డిపాజిట్‌ను తిరిగి వారి బ్యాంక్ ఖాతాల్లో జమ చేసేందుకు చర్యలు ప్రారంభించారు.
Also Read: Thalliki Vandanam: తల్లికి వందనం డబ్బులు రేపే జమ.. విద్యార్థులకు శుభవార్త
ఎంపికైన లబ్ధిదారులకు మొబైల్ నంబర్ మార్చుకునే అవకాశం
ఇందిరమ్మ ఇళ్లకు ఎంపికైన కొందరు లబ్ధిదారులు దరఖాస్తు సమయంలో మొబైల్ నంబర్లను తప్పుగా నమోదు చేసినట్లు అధికారులు గుర్తించారు. మరికొందరికి ప్రస్తుతం ఉపయోగిస్తున్న మొబైల్ నంబర్ మారడంతో వివరాలను సవరించుకునే అవకాశం కల్పించాలని విజ్ఞప్తులు వచ్చాయి.
దీంతో తెలంగాణ హౌసింగ్ బోర్డు అధికారిక వెబ్‌సైట్‌లో మొబైల్ నంబర్ అప్‌డేట్ చేసుకునే సదుపాయాన్ని అందుబాటులోకి తీసుకొచ్చినట్లు సమాచారం.
ఎంపికైన లబ్ధిదారులు తమ దరఖాస్తు నంబర్ లేదా ఆధార్ నంబర్ ఆధారంగా అప్లికేషన్ వివరాల్లోకి వెళ్లి మొబైల్ నంబర్‌ను మార్చుకునే అవకాశం ఉంది.
Also Read: Andhra Pradesh: ప్రభుత్వ స్కూళ్లలో స్టీమ్ రైస్.. ఏపీ ప్రభుత్వ కీలక నిర్ణయం
హైదరాబాద్‌లో క్షేత్రస్థాయి సర్వే
మరోవైపు హైదరాబాద్‌లో ఇందిరమ్మ ఇళ్లకు ఎంపికైన కుటుంబాలపై క్షేత్రస్థాయి పరిశీలన కొనసాగుతోంది. ఇప్పటివరకు సుమారు 5,500 కుటుంబాలను అధికారులు నేరుగా పరిశీలించినట్లు సమాచారం.
లబ్ధిదారుల వివరాలు, అర్హతకు సంబంధించిన అంశాలను అధికారులు క్షేత్రస్థాయిలో ధృవీకరిస్తున్నారు. ఈ సర్వేను మరో రెండు రోజుల్లో పూర్తి చేసే అవకాశం ఉన్నట్లు తెలుస్తోంది.
సర్వే పూర్తైన అనంతరం తుది లబ్ధిదారుల జాబితాను సిద్ధం చేసి తెలంగాణ హౌసింగ్ బోర్డు వెబ్‌సైట్‌లో అందుబాటులో ఉంచనున్నట్లు సమాచారం.
దీంతో అర్హత పొందిన వారి ఇళ్ల కేటాయింపు ప్రక్రియ తదుపరి దశకు వెళ్లనుండగా, అర్హత సాధించని దరఖాస్తుదారులకు వారు ముందుగా చెల్లించిన రూ.10 వేల డిపాజిట్ తిరిగి అందనుంది.