Rythu Bharosa: తెలంగాణ రాష్ట్ర ప్రభుత్వం రైతులకు ఆర్థిక భరోసా కల్పించే దిశగా మరో కీలక నిర్ణయం తీసుకుంది. వానాకాలం సాగు సీజన్‌ను దృష్టిలో ఉంచుకుని రైతు భరోసా పథకం కింద మూడో విడత నిధులను ఈ నెల 30న విడుదల చేయాలని నిర్ణయించింది. ముఖ్యమంత్రి రేవంత్ రెడ్డి అధ్యక్షతన సచివాలయంలో జరిగిన మంత్రివర్గ సమావేశంలో ఈ అంశంపై చర్చించి తుది నిర్ణయం తీసుకున్నట్లు సమాచారం.
ఈ నిధుల విడుదల కార్యక్రమాన్ని ఖమ్మం జిల్లా మధిరలో నిర్వహించే భారీ బహిరంగ సభలో ప్రారంభించనున్నారు. అదే రోజు అర్హులైన రైతుల బ్యాంకు ఖాతాల్లో నేరుగా నగదు జమ కానుంది. సాగు ఖర్చులను తగ్గించి రైతులకు ఆర్థిక సహాయం అందించాలనే లక్ష్యంతో ప్రభుత్వం రైతు భరోసా పథకాన్ని అమలు చేస్తోంది.
జూన్ 30న రైతు భరోసా మూడో విడత నిధుల పంపిణీ
రాష్ట్రవ్యాప్తంగా రైతు భరోసా పథకం కింద సుమారు 1.50 కోట్ల ఎకరాలకు పెట్టుబడి సాయం అందుతోంది. ఈ పథకం ద్వారా ప్రతి ఎకరానికి ఏడాదికి రూ.12,000 చొప్పున సహాయం అందజేస్తున్నారు. యాసంగి, వానాకాలం సీజన్లకు విడివిడిగా నిధులు విడుదల చేస్తూ ఒక్కో సీజన్‌కు ఎకరానికి రూ.6,000 చొప్పున రైతుల ఖాతాల్లో జమ చేస్తున్నారు.
ఇప్పటికే రెండు విడతల నిధుల పంపిణీ పూర్తైంది. తొలి విడతలో చిన్న, సన్నకారు రైతులకు ప్రాధాన్యం ఇచ్చి పెట్టుబడి సాయం అందించారు. రెండో విడతలో రాష్ట్రవ్యాప్తంగా 45 లక్షలకు పైగా రైతులు లబ్ధి పొందారు. ఈ దశలో ప్రభుత్వం రూ.5,653 కోట్లకు పైగా నిధులను రైతుల ఖాతాల్లో నేరుగా జమ చేసింది. రాష్ట్రంలో నమోదైన సుమారు 73 లక్షల మంది రైతులకు దశల వారీగా ఈ ప్రయోజనం అందేలా ప్రభుత్వం చర్యలు చేపడుతోంది.
ఇదే సమయంలో కేంద్ర ప్రభుత్వం కూడా ప్రధాన మంత్రి కిసాన్ సమ్మాన్ నిధి (PM-KISAN) పథకం కింద రైతులకు ఆర్థిక సాయం అందించనుంది. జూన్ 20న విడుదల కానున్న తదుపరి విడతలో అర్హులైన రైతుల ఖాతాల్లో రూ.2,000 చొప్పున జమ చేయనున్నారు. దీంతో కేంద్ర, రాష్ట్ర ప్రభుత్వాల నుంచి తక్కువ వ్యవధిలోనే రైతులకు నగదు సాయం అందనున్నది.
సన్న రకాల వరి సాగుకు ప్రోత్సాహం.. రైతుల ఆదాయం పెంపుపై దృష్టి
రైతుల ఆదాయాన్ని పెంచేందుకు తెలంగాణ ప్రభుత్వం వ్యవసాయ రంగంలో పలు సంస్కరణలు చేపడుతోంది. ఉప ముఖ్యమంత్రి భట్టి విక్రమార్క అధ్యక్షతన జరిగిన మంత్రివర్గ ఉపసంఘ సమావేశంలో వ్యవసాయ ఉత్పత్తి, ధాన్యం కొనుగోలు, నిల్వ సదుపాయాలు, వానాకాలం సాగు ఏర్పాట్లపై సమగ్ర సమీక్ష నిర్వహించారు.
ఈ సందర్భంగా మంచి మార్కెట్ డిమాండ్ ఉన్న ఏడు మేలుజాతి సన్న రకాల వరి సాగును ప్రోత్సహించాలని ప్రభుత్వం నిర్ణయించింది. దేశీయ, అంతర్జాతీయ మార్కెట్లలో ఈ రకాల బియ్యానికి అధిక డిమాండ్ ఉండటంతో రైతులకు మెరుగైన ధరలు లభించే అవకాశముందని అధికారులు పేర్కొన్నారు. అలాగే పేద ప్రజలకు నాణ్యమైన సన్నబియ్యం అందించాలనే లక్ష్యంతో ఈ కార్యక్రమాన్ని అమలు చేస్తున్నట్లు వెల్లడించారు.
వ్యవసాయశాఖ మంత్రి తుమ్మల నాగేశ్వరరావు మాట్లాడుతూ వానాకాలం సాగుకు అవసరమైన విత్తనాలు, ఎరువులు సమృద్ధిగా అందుబాటులో ఉంచినట్లు తెలిపారు. ఎగుమతులకు అనుకూలమైన సన్న రకాల వరికి ప్రత్యేక బోనస్ కూడా కొనసాగుతుందని చెప్పారు. రైతులకు ఎలాంటి ఇబ్బందులు తలెత్తకుండా అన్ని శాఖలు సమన్వయంతో పనిచేస్తున్నాయని స్పష్టం చేశారు.